පාඩම - පැරණි නාඩගම් ගී අනුසාරයෙන් නිර්මාණය වූ නව නාට්‍ය ගී
ගුරු භාවතා - රංග ගුණවර්ධන
පන්තිය පැවැත්වූ දිනය - 2020/05/27
පන්තිය පැවැත්වූ වේලාව - ප.ව. 5.00-7.00
---------------------------------------------------------
සුභ සන්ධ්‍යාවක් වේවා 10 ශ්‍රේණියේ සංගීතය හදාරන දරුවො හැමෝටම
අපි දැන් අදට නියමිත පාඩම ආරම්භ කරමු.
අද පාඩම ව්‍යවහාරික සංගීතය කොටසේ සටහන් කර ගන්න.
පැරණි නාඩගම් ගී අනුසාරයෙන් නිර්මාණය වූ නව නාට්‍ය ගී
ලාංකේය ගැමි නාට්‍ය සම්ප්‍රදයන් අතර නාඩගම් නාට්‍ය කලාව සුවිශේෂී වූ ප්‍රබල රංග සම්ප්‍රදායක් ලෙස හැදින්වීමට පිළිවන.නාඩගම් නාට්‍ය සම්ප්‍රදාය නාට්‍ය ඉතිහාසය තුළ වැදගත් වූ සන්ධිස්ථානයක් ලෙස සදහන් කළ හැක.සොකරි,කෝළම් යන ජන නාට්‍ය ශෛලියෙන් ඇරඹි දේශීය ගැමි නාට්‍ය කලාව නාඩගම් හා නූර්ති සම්ප්‍රදායන්ගෙන් තව තවත් පෝෂණය වී දේශීය "නව නාට්‍ය සම්ප්‍රදායට" අවතීර්ණ විය.
ක්‍රි.ව. 1956 දී මහාචාර්ය එදිරිවීර සරත්චන්ද්‍රයන් විසින් රචිත මනමේ නාට්‍ය නිර්මාණය වීමත් සමග ලාංකේය නව නාට්‍ය කලාවේ සමාරම්භය සනිටුහන් විය.
දේශීය නාට්‍ය කලාව නව මගකට යොමු කරමින් නව නාට්‍ය කලාවේ පියා ලෙස සැලකෙන්නේ මහාචාර්ය එදිරිවීර සරත්චන්ද්‍රයන්ය.එතුමා දේශීය නාට්‍ය කලාව නව මගකට යොමු කරමින් නව නාට්‍ය සම්ප්‍රදායට නව අරුතක් හා නව යුගයක් උදා කරවීය.ශ්‍රී ලාංකිකයන්ට ද නැවුම් අත්දැකීමක් වූ නව නාට්‍ය සම්ප්‍රදාය තාත්වික නාට්‍ය,ශෛලීගත නාට්‍ය,අර්ධ ශෛලීගත නාට්‍ය හා මුද්‍රා නාට්‍ය වශයෙන් ප්‍රභේද කොට දැක්විය හැක.එකී නාට්‍ය ප්‍රභේදයන් හරහා විවිධ ශෛලියෙන් ගොඩ නැගුණු නාට්‍ය නිර්මාණ කෘති යුගයෙන් යුගයට දශක ගණනාවක් පුරා සහෘද හදවත් අමන්දානන්දයටත්,
රසික ජන මනස ආකර්ශනය කර ගැනීමටත් සමත් විය.
මහාචාර්ය එදිරිවීර සරත්චන්ද්‍රයන්ගේ මනමේ,සිංහබාහු යන සුවිශිෂ්ට නාට්‍ය නිර්මාණ කෘති සදහා මූලික පදනම හා ආභාසය ලබා ඇත්තේ ඉපැරැණි නාඩගම් නාට්‍ය සම්ප්‍රදායෙනි.එදිරිවීර සරත්චන්ද්‍රයන් පැරණි නාඩගම් නාට්‍ය කලාවේ නාට්‍ය ශෛලිය,රංග ශෛලිය,නාට්‍ය සංගීතය,නාට්‍යමය මූලිකාංග,ශිල්පාංග හා මූලධර්මයන් පර්‍යේෂනාත්මකව අධ්‍යයනය කර දේශීය නව නාට්‍ය සම්ප්‍රදාන් ගොඩනැංවීමට එතුමාගේ ස්වකීය ප්‍රතිභා පූර්ණ කලා කෞශල්‍යයත් සිවිෂද පරිකල්පන ශක්තියත් මෙහෙයවා ක්‍රියා කළ බව මනාව විද්‍යාමාන වේ.එතුමන් ස්වකීය ප්‍රතිභා කලා කෞශල්‍යය තුළින් නාඩගම්,නූර්ති නාට්‍ය සම්ප්‍රදායන් අභිබවා දේශීය අනන්‍යතාව මතු කර දැක්වීමට සිය නිර්මාණාත්මක කෞශල්‍යය විදහා පෑමට " නව නාට්‍ය කලාව" තුළින් සමත් වූ බව ප්‍රත්‍යක්ෂ වන සාධකයකි.
ඉපැරැණි නාඩගම් නාට්‍ය සංගීතය ඇසුරින් නූතන නව නාට්‍ය කලාවේ නාට්‍ය කෘති සදහා විශේෂයෙන් මනමේ හා සිංහබාහු නාට්‍ය කෘති වල නාට්‍ය ගීත බොහොමයක නාඩගම් ගී තනු,රිද්මයන් හා නාද රටාවන් ගැබ්ව පවතී.නාඩගම් නාට්‍ය ගීත වල ගමන් තාල,දෙබස් සංවාද වල සංගීතාංග,ගායන වාදන ශෛලීන්,විවිධ සංගීතමය,නර්තනමය හා නාට්‍යමය අංගයන් හා ශිල්පීය ක්‍රම නූතන නව නාට්‍ය සංගීතය තුළින් ගෙන හැර පෑමට සරත්චන්ද්‍රයන් දැක්වූ නාට්‍යමය ප්‍රතිභාවත් සංගීත කලා පරිඥානයත් අතිමහත්ය.
පහත දැක්වෙන්නේ එතුමන් විසින් රචිත මනමේ නාට්‍ය කෘතිය සදහා නිර්මාණය වූ නව නාට්‍ය ගී කිහිපයකි.නරඹා රසාස්වාදය කරන්න.
පැරණි නාඩගම් නාට්‍ය වල ගී තනු පාරම්පරිකව පැවතුණු නිසා ශිල්පීන්ගේ අභාවයත් සමගම ගී තනු අප්‍රචලිත විය.මෙසේ නාඩගම් රංග සම්ප්‍රදායෙහි ගී තනු,ගායන වාදන අංග යන සංගීතාත්මක මූලාශ්‍ර අභාවයට යාමට නොදී පාරම්පරික ශිල්පීන්ගෙන් ලබා ගෙන සංරක්ෂණය කොට නව නාට්‍ය සංගීතය රසාලිප්ත කලාංගයක් බවට පත් කිරීමට එතුමා දැඩි පරිශ්‍රමයක් ගත් බව විද්වතුන්ගේ මතය වේ.නව නාට්‍ය කලාව වූ කලී නාට්‍ය සහිත්‍යායේත්,පැරණි නාඩගම් නාට්‍ය සංගීතයේත් අපූර්වවූත්,විචිත්‍රවූත් සෞන්දර්‍යාත්මක සුසංයෝගයක් ලෙස එතුමා සාධක මානව විදහා දැක්වීය.සිංහල නාට්‍ය වංශයේ අමරණීය කෘතීන් ලෙස මනමේ හා සිංහබාහු නව නාට්‍ය කෘති අගය කළ හැක.
* නූතන මනමේ,සිංහබාහු නව නාට්‍ය ගීත සදහා ඉපැරැණි නාඩගම් ගී වල ආභාසය ලැබී ඇති අයුරු පහත ගීත ලැයිස්තුව අධ්‍යයනය කිරීමෙන් එය ප්‍රත්‍යශ වේ.
* මනමේ,සිංහබාහු නව නාට්‍ය ගීත වලට අදාළ ගී පද මාලාවන් හ ස්වර ප්‍රස්ථාරයන් මෙසේය.
එහෙනම් පුතේ පැරණි නාඩගම් ගී අනුසාරයෙන් නිර්මාණය වූ නව නාට්‍ය ගී පාඩම මින් අවසානයි. සියලු දෙනාම ඉහත සටහන හා දී ඇති ගීත ඇතුළත් වීඩියෝ පට හොදින් අධ්‍යයනය කර රසාස්වාදය කරන්න. ඊළඟ දිනයේදී විභාග ප්‍රශ්න පත්‍රයකට පිළිතුරු ලිවීමට සූදානම් වන්න.
හැමදෙනාටම තෙරුවන් සරණයි.
ආයුබෝවන් 🙏
No comments:
Post a Comment